Judg 12 | NdeIBE | STEP | Abantu bako-Efrayimi babiza amabutho abo, bachaphela eZafoni basebesithi kuJefitha, “Kungani wena wayakulwa lama-Amoni ungasibizanga ukuba sihambe lawe na? Sizakutshisela endlini yakho.”

Judges 12

UJefitha lo-Efrayimi

1 Abantu bako-Efrayimi babiza amabutho abo, bachaphela eZafoni basebesithi kuJefitha, “Kungani wena wayakulwa lama-Amoni ungasibizanga ukuba sihambe lawe na? Sizakutshisela endlini yakho.”

2 UJefitha waphendula wathi, “Mina labantu bami sasilengxabano enkulu lama-Amoni njalo, lanxa nje ngalibiza, kalingihlenganga ezandleni zawo. 3 Kwathi sengibona ukuthi lalingeke lisize, ngabeka impilo yami engozini ngachaphela ngaphetsheya ukuyakulwa lama-Amoni, uJehova wawanikela esandleni sami. Pho kungani lina lamhla selizekulwa lami?”

4 UJefitha wabuthanisa abantu baseGileyadi balwa lo-Efrayimi. AbaseGileyadi babacakazela phansi ngoba abako-Efrayimi babethe, “Lina maGileyadi lingamabhazuka ako-Efrayimi lakoManase.” 5 AbaseGileyadi bathumba amazibuko aseJodani awokuya ko-Efrayimi, njalo kwakusithi owako-Efrayimi osindileyo angathi, “Ngivumelani ngichaphele ngaphetsheya,” abantu baseGileyadi babembuza bathi, “Ungowako-Efrayimi na?” Angaphendula athi, “Hayi,” 6 bathi, “Kulungile, wothi, ‘Shibholethi.’ ” Uma angathi, “Sibholethi,” ngokuba engeke alitsho kuhle, babemphuthuma bambulalele emazibukweni aseJodani. Abako-Efrayimi abayizinkulungwane ezingamtshumi amane lambili babulawa ngalesosikhathi.

7 UJefitha wakhokhela u-Israyeli iminyaka eyisithupha. UJefitha wafa, wangcwatshwa emzini waseGileyadi.

U-Ibhizani lo-Eloni lo-Abhidoni

8 Ngemva kwakhe, u-Ibhizani waseBhethilehema wakhokhela u-Israyeli. 9 Wayelamadodana angamatshumi amathathu lamadodakazi angamatshumi amathathu. Amadodakazi akhe wawendisela kwabangaphandle komhlobo wakibo kwathi amadodana akhe wawalethela izintombi ezingamatshumi amathathu ezingasizo zomhlobo wakibo ukuba zibe ngomkawo. U-Ibhizani wakhokhela u-Israyeli iminyaka eyisikhombisa. 10 U-Ibhizani wafa, wangcwatshwa eBhethilehema.

11 Ngemva kwakhe, u-Eloni umZebhuluni wakhokhela u-Israyeli iminyaka elitshumi. 12 UEloni wafa, wangcwatshwa e-Ayijaloni elizweni lakoZebhuluni.

13 Ngemva kwakhe, u-Abhidoni indodana kaHileli, owasePhirathoni, wakhokhela u-Israyeli.

14 Wayelamadodana angamatshumi amane lamadodana amadodana angamatshumi amathathu, ayegada obabhemi abangamatshumi ayisikhombisa. Wakhokhela u-Israyeli iminyaka eficamibili. 15 U-Abhidoni indodana kaHileli wafa, wangcwatshwa ePhirathoni ko-Efrayimi, elizweni lezintaba elama-Amaleki.